आगलागीमा परी मृत्यु तथा धनमाल जलेर नष्ट

काठमाडौँ । गुल्मी, धुर्कोट गाउँपालिका–७ वाग्ला धाराखोलीस्थित बलेसल्ला सामुदायिक वनमा शुक्रबार दिउँसो आगलागी हुँदा आगलागीमा जलेर सोही ठाउँ बस्ने शंकर परियारकी छोरी ९ वर्षीया संगिता परियारको शुक्रबार दिउँसो मृत्यु भएको छ । घर नजिकै रहेको खोलामा नुहाई घर फर्कने क्रममा उक्त आगलागीमा जलेर उनको मृत्यु भएको बताइएको छ ।
दैलेख, गुराँस गाउँपालिका-७ छौउडेकाँडास्थित सार्वजनिक जंगलमा लागेको आगो फैलिएर सोही ठाउँ बस्ने ढोज बहादुर खड्काको २ वटा घरमा समेत शुक्रबार दिउँसो आगलागी हुँदा करिब ७ लाख रुपैयाँ बराबरको धनमाल जलेर नष्ट भएको छ ।
धनकुटा, धनकुटा नगरपालिका–८ टिकावा साकिला सामुदायिक बनमा लागेको आगो फैलिएर सोही ठाउँ डाँडा टोल बस्ने जनकसिंह राईको घरमा शुक्रबार दिउँसो आगलागी हुँदा करिब ४ लाख रुपैयाँ बराबरको धनमाल जलेर नष्ट भएको छ ।
दाङ, बंगलाचुली गाउँपालिका–३ दाङबाङ बस्ने खोपीराम डाँगीको परालमा शुक्रबार दिउँसो आगलागी भई बस्तीमा फैलिएर खोपीरामको ३ वटा घर तथा २ वटा गोठ पूर्ण रूपमा र टेकी डाँगीको घर आंशिक रूपमा जलेर करिब ५० लाख रुपैयाँ बराबरको धनमाल नष्ट भएको छ ।
मोरङ, मिक्लाजुङ गाउँपालिका–७ नयाँ प्रगतिटोल बस्ने नन्द बहादुर पौडेलको भान्छा घरमा गएराति आगलागी हुँदा भान्छा घर र गोठ समेत पूर्ण रूपमा जलेर करिब ८ लाख रुपैयाँ बराबरको धनमाल नष्ट भएको छ ।
पर्सा, वीरगंज महानगरपालिका–३२ चोर्नीस्थित ना.३ त ५०२९ नम्बरको ट्याक्टर स्टार्ट गर्ने क्रममा आगोको झिल्का गहुँमा झर्न गई सोही ठाउँ बस्ने सुरेश पासवानको समेत ३ जनाको गहुँबालीमा शुक्रबार दिउँसो आगलागी हुँदा गहुँबाली पूर्णरुपमा जलेर करिब ५ लाख रुपैयाँ बराबरको धनमाल जलेर नष्ट भएको छ । ट्याक्टर प्रहरीको नियन्त्रणमा रहेको छ ।
स्थानीय वासिन्दा तथा दमकलको सहयोगमा आगलागी नियन्त्रणमा लिनुका साथै यस सम्बन्धमा प्रहरीले थप अनुसन्धान गरिरहेको छ ।