अवैध भरुवा बन्दुक सहित पक्राउ

काठमाडौं । सोलुखुम्बु, माप्य दुधकोशी गाउँपालिका-७ बस्ने २७ बर्षीय दिल कुमार राईलाई १ थान अवैध भरुवा बन्दुक सहित शनिबार साँझ प्रहरीले पक्राउ गरेको छ । विशेष सूचनाको आधारमा प्रहरी चौकी वाकुबाट खटिएको प्रहरीले राईलाई सोही ठाउँस्थित ओढारमा उक्त हतियार सहित फेला पारी पक्राउ गरेको हो । बैतडी, मेलौली नगरपालिका-३ ढणन बस्ने २५ बर्षीय लक्ष्मण चन्दको घरबाट १ थान एकनाले अवैध भरुवा बन्दुक गएराति प्रहरीले बरामद गरेको छ । भरुवा बन्दुक पड्किदा चन्द घाइते भएको भन्ने खबर प्राप्त हुनासाथ प्रहरी चौकी सलेनाबाट खटिएको प्रहरीले उनको घरबाट उक्त बन्दुक बरामद गरेको हो । घाइते चन्दलाई मेडिकल कलेज कोहलपुर बाँके हुँदै थप उपचारको लागि शिक्षण अस्पताल महाराजगञ्ज काठमाडौं पठाइएको छ ।
यस सम्बन्धमा स्थानीय प्रहरीले थप अनुसन्धान गरिरहेको छ ।